Plantun de Prouvènço

Pèr coumpara dos planto d'encò nostre

Carex sempervirens & Ranunculus repens

Queirello(-toujour-verdo)

Carex sempervirens

Cyperaceae

Àutri noum : Moutouso, Sagneto.

Noms en français : Laîche toujours verte, Laîche sempervirente.

Descripcioun :
Queirello de mountagno mounte i'èi coumuno. I' agrado li relarg pulèu secous ounte ié fai de mato. Caup uno à dos (raramen fin qu'à 5) espigueto masclo e dos à cinq espigueto femello brunello pourtado, pèr li d'en bas, pèr de pecou. Lis utriculo fan de 4 à 6(7) mm emé un bè de 1,2 à 2(3) mm denta (fotò) Se recounèis peréu à si fueio un pau larjo, de 1,5 à 4(6) mm e plano. La subsp. que trachis au nostre, ié dison sempervirens.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 50(60) cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Brunello
Petalo : ges
Ø (o loungour) enflourejado : 10 à 20 mm
Flourido : Printèms - Estiéu

Sòu : Ca(Si)
Autour basso e auto : Pancaro entresigna
Aparado : Noun

Liò : Tepiero seco - Esboudèu - Mountagno mejano - Auto montagno
Estànci : Mountagnard à Aupen
Couroulougi : Ouroufito-Sud-Éuropenco
Ref. sc. : Carex sempervirens Vill., 1787

Crèbo-biòu

Ranunculus repens

Ranunculaceae

Àutri noum : Auriflam, Gros-boutoun-d'or.

Nom en français : Renoncule rampante.

Descripcioun :
Lou crèbo-biòu, uno meno de gros-boutoun-d'or (Var) trachis dins li relarg umide, èi pèr acò qu'èi pas toujour, au nostre, uno planto coumuno. Se recounèis à si fiéu (estouloun) que podon faire fin qu'à 2 mètre de long e que s'enracinon (fotò). Li sepalo rèston contro li petalo e lou fru èi lisc.

Usanço :
Coume tóuti li ranouncle, es uno planto empouisounanto, tambèn pèr li bèsti (crèbo-biòu). Pamens un cop seco o couito, l'anemonino caupudo èi trasfourmado e pu toussico. Se dis qu'èro manjado cuecho di tèms de carestié.